Маңғыстау теміржолшылары көмір қорын толықтырып жатыр

«Вагонсервис» АҚ Маңғыстау телімінің Маңғыстау станциясы үшін биылғы қысқы маусымға 10 вагон көмір жоспарланған. Қазірге дейін соның екі вагоны қоймада, тағы бес вагоны жолда. Ал Бейнеу станциясы бойынша екі есе көп. Пойыздар қозғалысына байланысты мұнда қыс қажеттілігін өтеуге 20 вагон көмір кетеді екен. Бүгінге дейін Бейнеу қоймасына 4 вагон – 276 тонна көмір түсіріліпті. Қалғаны келіп жатыр.

«Қаражыра көмірін алып жатырмыз. Жақында 150 тоннаны Маңғыстау станциясындағы қоймаға түсіріп алдық. Қойманың үсті жабық, кез келген ауа райында жақсы сақтауға болады. Ал Бейнеуде НЖС мекемесінің қоймасын жалдап отырмыз», – дейді бұл жөнінде «Вагонсервис»» АҚ Маңғыстау телімінің шебері Қосай Сейтқалиев.

Мекеме, сондай-ақ, вагондардың қысқа дайындығын да аяқтап қалыпты. ТО-2 жөндеуден 40 жолаушы вагоны өтуі жоспарланған екен.15 қазанға дейін 32 вагон тиісті жөндеуден өткен. Айдың аяғына дейін жоспар толық орындалады дейді мамандар. Сонымен қатар ТО-3 жөндеу түрінен қыркүйек-қазан айларында 60 вагон өтуі керек болатын. Оның 42-сі дайындық сапына қойылған. Ал ТО-1 ағымдағы жөндеу цехында күніне жиырма шақты вагонға қызмет көрсетіледі.